Er mwyn yr achos

Amgueddfa Cymru, ein Llyfrgell Genedlaethol, Comisiynydd yr Iaith, ‘Y Brifysgol’, ein hawdurdodau lleol … yr un yw’r stori ym mhob man, gwasgfa, toriadau …

Ond cymerwn gysur, ac ymwrolwn. Pam yr ydym yn cwyno? Onid ydym yn deall fod yn iawn inni i gyd aberthu dros un achos mawr?

● Beth yw’r achos mawr hwnnw? ATEB: mawredd Lloegr.

● Beth sy’n cynnal y mawredd hwnnw? ATEB: Trident. ‘The Bedrock’ ys dywedodd Syr Anysbrydoledig y diwrnod o’r blaen.

● Pwy sy’n rheoli Trident? ATEB: America.

● Ble mae Trident wedi ei hangori? ATEB: Sgotland.

‘Ddyniadon ynfyd’, chwedl yr hen fardd hwnnw ers talwm, onid ydych yn deall? I ddiogelu’r ‘Bedrock’, ac felly fawredd ein hundeb a’n teyrnas, rhaid rhwystro i’r Albanwyr yna fynd am annibyniaeth. Dyna fyddai ei diwedd-hi. Dyna pam y trefnwyd, ar gost aruthrol ac ar eich rhan chi oll, ‘Ddiwrnod Fred West’ y llynedd.

Mae Rishi bach yn addo gwario mwy ar y Bedrock, ac Anysbrydoledig yn addo gwario mwy eto. Chware teg, mae ’na lot o waith cynnal a chadw i’w wneud, wyddoch chi, efo’r sybmarîns yn rhydu ac yn saethu ffordd rong a ballu …

Rhown heibio ein buddiannau bach plwyfol a hunanol felly. Os yw corff cyhoeddus yng Nghymru yn gorfod mynd heb ddirprwy gydlynydd rhan-amser gwerthuso mewnbwn, cofiwn fod y cyfan er mwyn pwrpas uwch.