Un dda gan Syr Anysbrydoledig heddiw. Beryg ei fod wedi cael tipyn bach o ysbrydoliaeth o rywle? Meddai yn y Daily Telegraph (ble arall?), Llafur yw ‘the true party of English patriotism’. A does ganddo ddim amynedd â neb sy’n petruso chwifio baner San Siôr, ‘a symbol of pride, belonging and inclusion’. Am y Torïaid, dim hawl bellach i’w galw’u hunain yn blaid wladgarol. Maent wedi ‘esgeuluso’n lluoedd [arfog wrth gwrs] … ac wedi bychanu rhai o’n sefydliadau cenhedlig balchaf – o’r BBC i’r Ymddiriedolaeth Genedlaethol, a thîm pêl-droed Lloegr.’
Dyna ichi gatalog o gamweddau! A dyma ichi rai meddyliau cymysg.
● Onid baner annibyniaeth Lloegr yw croes San Siôr, ac onid yw ei chwifio yn rhagdybio annibyniaeth yr Alban? Chwifiwch hi, Syr Keir.
● Ond yn y cyfamser, hwyrach na byddai plastro’r neges hon hyd yr Alban yn ddrwg yn y byd. Yng Nghymru, ni wnâi unrhyw wahaniaeth.
● Hanner munud, onid sefydliadau PRYDEINIG yw’r BBC a’r Ymddiriedolaeth Genedlaethol? Ond efallai fy mod i’n anghywir, canys dyma hwy ar yr un tir â thîm pêl-droed Lloegr. Beryg mai sefydliadau Lloegr ydyn nhw, deudwch?
● Cofiwch bob amser yr hyn a ddywedais ryw dro o’r blaen. ‘Gwladgarwch’ (patriotism) yw’r un neis; arferir gan Loegr a chan ba bwerau bynnag sydd ar ochr Lloegr yr wythnos yma. ‘Cenedlaetholdeb’ (nationalism, ac yn aml narrow nationalism) yw’r un ddim-yn-neis; arferir gan ‘lesser breeds’ chwedl Kipling.
Blog Glyn Adda 
Gadael sylw